Bashkia Tiranë me Ndërmarrjet e saj 1, 2, 3 të Punëtorëve të Qytetit, Agjencia e Parqeve dhe Rekreacionit, Drejtoria e Përgjithshme e Promovimit të Qytetit së bashku me një grup të konsiderueshëm Vullnetarësh  do të kryejnë një aksion sensibilizues me qëllim  pastrimin, rehabilitimin e zonave të ndotura dhe gjelbërimin e tyre.

Duke qënë se jemi në vigjilje të vitit të Skënderbeut, aksioni do të zhvillohet në aksin rrugor Qafë Kashar deri në qytetin e Krujës, në datë 22.12.2017 në orën 09.00.

Drejtoria e Përgjithshme e Promovimit të Qytetit ka ndërmarrë nisma të shpeshta pastrimi  të cilat i kanë mundësuar fitimin e një eksperience pozitive në organizimin e aksioneve të tilla. Për këtë qëllim është menduar të shpërndahet stafi i Bashkisë Tiranë dhe grupi i Vullnetarëve në të gjithat zonat e ndotura dhe problematike të cilat shtrihen përgjatë aksit rrugor të mësipërm. Drejtoria e Përgjithshme e Promovimit të Qytetit ka koordinuar aksionin me Ndërmarrjet 1,2,3 të Punëtoreve të Qytetit dhe Agjencinë e Parqeve dhe Rekreacionit me qëllim sigurimin e mjeteve të punës dhe të gjithë logjistikës së nevojshme për organizmin e një aksioni efikas dhe të sukseshëm.

Fokusi i këtij aksioni do të jetë jo vetëm pastrimi i zonave të ndotura por edhe rehabilitimi i sinjalistikës rrugore dhe sensibilizimi i banorëve për një mjedis sa me të pastër. Një vëmendje e veçantë do ti kushtohet gjelbërimit të këtyre zonave të ndotura si një faktor i rëndësishëm për kufizimin e ndotjes së ambjentit dhe mbajtjes së tij pastër.